ਟੀਮ ਇੰਡੀਆ ਦੇ ਸਾਬਕਾ ਮੁੱਖ ਕੋਚ ਰਾਹੁਲ ਦ੍ਰਾਵਿੜ IPL ਫਰੈਂਚਾਇਜ਼ੀ ਰਾਜਸਥਾਨ ਰਾਇਲਜ਼ ਦੇ ਮੁੱਖ ਕੋਚ ਬਣ ਗਏ ਹਨ। ਰਾਜਸਥਾਨ ਰਾਇਲਜ਼ ਦੇ ਸੀਈਓ ਜੈਕ ਲੂਸ਼ ਮੈਕਕਰਮ ਨੇ ਕਿਹਾ, “ਅਸੀਂ ਭਾਰਤੀ ਟੀਮ ਦੇ ਨਾਲ ਦ੍ਰਾਵਿੜ ਦੀ ਕੋਚਿੰਗ ਦੇਖੀ ਹੈ। ਰਾਇਲਜ਼ ਨਾਲ ਵੀ ਉਨ੍ਹਾਂ ਦਾ ਡੂੰਘਾ ਸਬੰਧ ਰਿਹਾ ਹੈ, ਅਸੀਂ ਖੇਡ ਅਤੇ ਟੀਮ ਲਈ ਉਨ੍ਹਾਂ ਦੇ ਜਨੂੰਨ ਨੂੰ ਦੇਖਿਆ ਹੈ।
ਕੋਚ ਬਣਨ ਤੋਂ ਬਾਅਦ ਬੋਲੇ ਰਾਹੁਲ ਦ੍ਰਾਵਿੜ
”ਵਿਸ਼ਵ ਕੱਪ ਤੋਂ ਬਾਅਦ ਇਹ ਦੂਜੀ ਚੁਣੌਤੀ ਸਵੀਕਾਰ ਕਰਨ ਦਾ ਸਹੀ ਸਮਾਂ ਹੈ” ਰਾਜਸਥਾਨ ਦੇ ਕੋਚ ਬਣਨ ਤੋਂ ਬਾਅਦ ਰਾਹੁਲ ਦ੍ਰਾਵਿੜ ਨੇ ਕਿਹਾ ਕਿ ਵਿਸ਼ਵ ਕੱਪ ਤੋਂ ਬਾਅਦ ਮੈਨੂੰ ਲੱਗਾ ਕਿ ਇਹ ਦੂਜੀ ਚੁਣੌਤੀ ਸਵੀਕਾਰ ਕਰਨ ਦਾ ਸਹੀ ਸਮਾਂ ਹੈ ਅਤੇ ਰਾਜਸਥਾਨ ਰਾਇਲਸ ਇਸਦੇ ਲਈ ਸਭ ਤੋਂ ਵਧੀਆ ਵਿਕਲਪ ਹੈ। ਰਾਜਸਥਾਨ ਰਾਇਲਜ਼ ਦੇ ਮਾਲਕ ਮਨੋਜ ਬਡਾਲੇ ਨੇ ਕਿਹਾ ਕਿ ਅਸੀਂ ਪਿਛਲੇ ਕੁਝ ਸਾਲਾਂ ਵਿੱਚ ਬਿਹਤਰ ਪ੍ਰਦਰਸ਼ਨ ਕੀਤਾ ਹੈ ਪਰ ਅਜੇ ਵੀ ਬਹੁਤ ਕੁਝ ਸਿੱਖਣ ਨੂੰ ਹੈ। ਦ੍ਰਾਵਿੜ ਦੀ ਵਾਪਸੀ ਨਾਲ ਸਾਡੀ ਤਰੱਕੀ ਤੇਜ਼ ਹੋਵੇਗੀ।
ਦ੍ਰਾਵਿੜ ਦੀ ਕੋਚਿੰਗ ‘ਚ ਟੀਮ ਇੰਡੀਆ ਵਿਸ਼ਵ ਚੈਂਪੀਅਨ ਬਣੀ
ਇਸ ਸਾਲ ਦ੍ਰਾਵਿੜ ਦੀ ਕੋਚਿੰਗ ‘ਚ ਟੀਮ ਇੰਡੀਆ ਵਿਸ਼ਵ ਚੈਂਪੀਅਨ ਬਣੀ ਸੀ। ਉਹ ਇਸ ਸਾਲ ਜੂਨ ‘ਚ ਹੋਏ ਟੀ-20 ਵਿਸ਼ਵ ਕੱਪ ‘ਚ ਭਾਰਤੀ ਟੀਮ ਦੇ ਮੁੱਖ ਕੋਚ ਸਨ। ਟੀਮ ਨੂੰ ਚੈਂਪੀਅਨ ਬਣਾਉਣ ਦੇ ਬਾਵਜੂਦ ਉਨ੍ਹਾਂ ਨੇ ਆਪਣਾ ਕਾਰਜਕਾਲ ਨਹੀਂ ਵਧਾਇਆ। ਭਾਰਤ ਨੂੰ ਮੁੱਖ ਕੋਚ ਵਜੋਂ ਟੀ-20 ਵਿਸ਼ਵ ਚੈਂਪੀਅਨ ਬਣਾਉਣ ਵਾਲੇ ਦ੍ਰਾਵਿੜ ਇਸ ਤੋਂ ਪਹਿਲਾਂ ਵੱਖ-ਵੱਖ ਪਰ ਬਹੁਤ ਮਹੱਤਵਪੂਰਨ ਭੂਮਿਕਾਵਾਂ ਵਿੱਚ ਰਾਇਲਜ਼ ਟੀਮ ਨਾਲ ਜੁੜੇ ਰਹੇ ਹਨ। ਉਹ ਆਈਪੀਐਲ ਦੇ 2012 ਅਤੇ 2013 ਸੀਜ਼ਨ ਵਿੱਚ ਟੀਮ ਦੇ ਕਪਤਾਨ ਸਨ। ਇਸ ਤੋਂ ਇਲਾਵਾ ਉਹ 2014 ਅਤੇ 2015 ਵਿੱਚ ਟੀਮ ਡਾਇਰੈਕਟਰ ਅਤੇ ਮੈਂਟਰ ਵੀ ਰਹੇ।
